家庭事業二揀一⋯⋯定二？

如果開齋第一 post 就講埋哂女性定型家庭事業人生交叉點會唔會太 heavy ？

喺香港，總係瀰漫住一種，做女人唔結婚生仔就係失敗嘅氛圍。即使而家二十一世紀，已經可以拎住部電話喺巴士睇 Netflix ，但「剩女」、「敗犬」等詞彙仍然未喺香港嘅網絡消聲匿跡。覺得女人就係「主內」嘅思維，仍然相當根深蒂固。

當然，係多咗人 challenge 呢個 assumption ，但奇怪嘅係， challenge 嘅方法就係另走極端：發展事業，無視家庭發展。女人當自強，我認同。但自強到抹殺咗家庭嘅價值，又好似 throw the baby away with the bath water 。然而，唔可以否定嘅係，香港係世上數一數二工時長嘅地方。只要你（一）係女性（二）有工作，你基本上可能連求偶／被求偶嘅時間都冇，就更莫論之後嘅組織家庭同生小朋友。

於是乎，香港嘅女性被夾喺兩難之中。你一係唔發展事業，全職做媽媽；你一係做女強人，唔好諗住做媽媽。喺呢個 dilemma ，如果我再講埋咩發展興趣 self actualisation ，根本係強人所難。

點解香港社會會變成咁？

我成日都講呢個故事。喺我 join 條 international team 嘅最後一年，去 Orlando 發表研究報告，同成條 team AirBnB 住咗一個星期。仲記得我一落機，接我嘅係一位女士。我初時對佢毫無認識，只係知道佢幾 nice ，幾好客，但又幾不拒小節。

去到 AirBnB ，佢帶咗我哋去買餸，幫手煮飯。佢因為住附近，所以唔喺我哋度瞓。但佢會拎佢阿媽焗嘅蛋糕嚟，幾個朝早都會嚟同我哋食早餐吹吓水。好簡單，就係家庭主婦一名。

我以為。

到正式自我介紹，原來呢位咁「師奶」嘅女士，係一間處理聲音嘅科技公司嘅 CTO 。但我嘅下巴仲未跌完。我哋有一晚大班去 barcade （bar + arcade ，有酒飲嘅機舖）玩，佢原來曾經係電競手！夠恐怖未？未。原來佢閒時仲會幫動畫配音，係一名 freelance 配音員。後尾講開音樂，原來佢屋企樂器多到可以 full band jam 歌。佢彈得一手好鋼琴。

你會以為，吓，咁佢一定係冇湊仔啦咁得閒。錯！佢有仔有女。而家有時見佢 Facebook post ，仲見到佢影佢阿女打機嘅相出嚟，仲話「果然有我基因」。

佢完完全全咁崩潰咗我心中家庭與事業嘅兩難。喺，香港係好難做到家庭事業兩兼顧。佢仲要 keep 到有 side hobbies ，完全達到咗人生 self actualisation 嘅顛峰。佢喺我內心燃點咗一把火：我想成為好似佢咁嘅女人。家庭，有。事業，有。興趣，有。三揀二？小孩子才做選擇。

喺我入到 FAANG 之前，我其實係舖緊路自己出 app 由嗰度搵錢，所以有一段時間我睇好多關於 small business 嘅資料，睇／聽好多外國講 content creation 同尋找 niche market 嘅 postcast / YouTube 。我睇中嘅，就係自己做老闆可以 manage 到自己時間，先做得到家庭事業兩兼顧。

上天眷顧， FAANG 向我招手，而佢提供到其他公司都冇辦法提供俾我嘅 flexi hour ，收入亦令我十分滿意。家庭事業兩兼顧嘅 necessary condition ，就係咁好好彩地入咗手。（當然，我認為我離真正 ready 建立一個家庭係有一個距離。而且，正所謂萬事俱備，只欠⋯⋯）

我唔係話女人一定要事業家庭兩兼顧。我覺得有啲人立志做家庭主婦，都可以係好偉大嘅理想，因為培養小朋友成長從來都唔係 easy task 。如果有人立志單身喺職場闖出一番新天地，佢都唔應該俾人話冇女人味，唔係一個女人。我只係不認為女人應該要被逼處於家庭事業二揀一嘅困局裡。一個女人嘅命運，不是應該佢自己想點做，就點做嗎？（排除殺人放火打劫姦淫擄掠 etc you know what I mean 。）

如果我哋個社會，係存在著一個女人一係生仔結婚一係做死一世老姑婆惡上司嘅死板印象，咁我哋成個社會 collectively 係咪應該要一齊幫幫手，諗吓計，點樣去改變呢個死局？